喺完成南非訓練到正式上船之間，有一個月時間返嚟香港執行李 
曾經由英國讀完書返港嘅我，以為今次由南非返嚟都應該好容易就適應香港嘅節奏。
結果大錯特錯。
第一日喺屋企張床瞓醒、起身、出廳，淨係部電視嘅聲都已經令我好忟憎
連我自己都唔知呢種煩躁嘅感覺係邊度嚟，我好快刷牙換衫，就衝咗落樓下個公園，想搵個安靜嘅角落頭自閉一吓⋯⋯ 嗰刻先發現原來我已經習慣咗一早起身望住個草原、聽住雀仔聲靈修嘅時間。
哦⋯⋯原來我好掛住安靜嘅空間。
到咗夜晚成家齊齊整整坐喺飯枱，我就雞啄唔斷咁同屋企人分享喺南非嘅經歷，講到眉飛色舞，好自信會感動到佢哋，我亦暗暗期待佢哋會好有深度咁回應我；但現實係細佬同老竇繼續扒飯，而阿媽只係講咗句：「阿仔，你改變唔到個世界㗎。」
我當刻失望到一個點⋯⋯ 非常難過，覺得佢哋完全唔明白我。
哦⋯⋯原來我好掛住同弟兄姊妹每日都有deep talk 嘅時候。 （後來我明白其實只係大家期望唔同：
我期望佢哋會好有興趣理解晒我所有故事，仲會問好多好好嘅問題（which is 一個唔現實嘅期望啦 ）；而喺佢哋嘅角度諗緊「阿仔只係走咗五個月，應該唔會有太大改變呱」，點知真係咁大改變？！所以佢哋其實唔知點樣回應我嘅經歷，對佢哋嚟講實在太遙遠啦。當期望越大，失望就越大。後來點樣調整自己嘅期望又係另一個學習了。
）
Timothy Lau（作者Timothy，90後宣教士，於英國讀大學時開始接觸宣教，本職為獸醫助理。數年前透過世界福音動員會(Operation Mobilisation) 投身宣教旅程。曾於南非參與短期門徒訓練，繼而到福音船 – 望道號上服侍。三年嘅船上生活中到訪15個國家，共29個港口。現已完成服侍回港，於OM香港以助理動員主任身分，繼續推動年青人投身宣教。）
