無助而脆弱
「莫非有人被邪靈附身……」呢個念頭閃過我嘅腦海，不寒而慄……
面對未知、驚魂未定之際，村長喘住氣跑向我哋：「佢哋係嚟搵你哋㗎。」呢刻令我更加不知所措。
全部隊員嘅目光投向我，等候指示。
「我哋一齊去睇睇吧……」我故作冷靜，慢慢咁講。
朝着嘶啞聲步近，微弱嘅月光慢慢照亮人群黝黑嘅臉龐。佢哋無一絲敵意，但係愁容滿面咁望住怪聲嘅源頭 — 一位少女。
「你哋可以為佢祈禱嗎？」其中一位女士向我哋詢問。
原來係村中一位少女哮喘病發。
心中嘅疑惑隨即蓋過恐懼：仲唔快啲帶佢去診所或者醫院？搵我哋又有咩用呢？村長向我哋慢慢翻譯：「已經係夜深，診所已關，我哋亦無任何交通工具可以帶佢去到遠方嘅醫院……聽講你哋係基督徒又係外國人，相信你哋嘅禱告會更有力量。所以你哋可以為佢祈禱嗎？」
於保守派教會長大嘅我，從來未試過為人治病禱告，完全唔知道點回答呢條問題。
全部隊員嘅目光再次投向我，等候指示。
「我哋一齊禱告吧……」我再次故作冷靜，緩緩地說道。
待續…
Timothy Lau（作者Timothy，90後宣教士，於英國讀大學時開始接觸宣教，本職為獸醫助理。數年前透過世界福音動員會(Operation Mobilisation) 投身宣教旅程。曾於南非參與短期門徒訓練，繼而到福音船 – 望道號上服侍。三年嘅船上生活中到訪15個國家，共29個港口。現已完成服侍回港，於OM香港以助理動員主任身分，繼續推動年青人投身宣教。）
繼續閱讀下集︰萊索托#3
閱讀上集︰萊索托#1
